Густ чад се крева денеска од повеќе населби во главниот град на Судан, Картум а во воздухот се слушаат рафални истрели од огнено оружје, во продолжението на крвавите судири меѓу Суданската армија и бунтовниците од силите за брза поддршка.
Повеќе од 185 луѓе се убиени во крвопролевањата а над 1800 ранети, според проценките на Обединетите нации/
Смртоносниот биланс веројатно е многу поголем, затоа што безживотните тела на убиените на улиците во Картум, особено во центарот на градот, никој не се обидува да ги отстрани заради интензивните судири.
Двете завојувани страни користат тенкови, артилерија и друг вид тешко вооружување во густо населените населби.
Во текот на минатата ноќ, борбени авиони гаѓаа и цели во стратешките владини згради – кои се сместени во станбените населби а најжестоките борби се водат околу главните бази на двете завојувани страни.
Шефот на американската дипломатија, Антони Блинкен, потврди и дека во жестоките престрелки во државата, оган од автоматско оружје бил отворен и кон конвој дипломатски возила на Соединетите држави.
Во инцидентот нема повредени дипломати, потврди Блинкен, додавајќи дека првичните проценки се дека за нападот се одговорни бунтовниците.
Борбата за превласт во Судан е меѓу двајца генерали, Абдел Фатах Бурхан, кој ги предводи армиските трупи и генералот Мохамед Хамдан Дагало, познат како Хемедти, кој ги предводи парамилитарните сили за брзо распоредување.
Поранешните сојузници заеднички го спроведоа воениот удар во Октомври 21-та година, која ја презедоа власта.
Никола Илиевски