Љупчо Палевски Палчо ќе биде вратен во Македонија откако сите административни процедури и потписите на турските министри за правда и за надворешни работи се ставени врз барањето за екстрадицијата на осомничениот за две убиства кои на крајот на ноември ја згрозија Македонија.
Палевски е осомничен за убиствата на ученичката Вања Ѓорчевска и пензионерот Панче Жежовски. Министерот за правда Кренар Лога преку обраќање на Фејсбук потврди дека ја добил информацијата.
- Ве информирам дека денес со официјална информација од Република Турција добивме одобрение за екстрадиција на лицето Љупчо Палевски. Позитивниот исход на постапката произлегува после сите максимално преземени мерки и активности од делокругот на надлежности на Министерството за правда, стои во ФБ статусот на Кренар Лога, министер за правда.
Единствено што се уште не е јавно објавено и потврдено е кога Палевски ќе биде донесен од Турција во Македонија. Ниту од јавното обвинителство немаат такви детали, но соопштија дека веднаш ќе биде спроведен во затворот во Шутка.
- Јавното обвинителство тукушто е известено дека Министерството за правда добило официјална информација од Република Турција дека се одобрува екстрадицијата на лице осомничено за две кривични дела грабнување, како и за две убиства на свиреп начин. Постапката за екстрадиција ќе биде спроведена преку МВР. По предлог на Основното јавно обвинителство Скопје на осомничениот веќе му е определена мерка притвор која треба да започне да се применува веднаш по неговото испорачување, соопшти Обвинителството.
На 22-ри ноември лани во Велес исчезна Панче Жежовски, со неговиот автомобил. Неколку дена подоцна исчезна и основката Вања Ѓорчевска, а истиот 27-ми ноември на падините на Скопска Црна Гора беше откриен запалениот автомобил на Жежовски.
Неколку лица беа уапсени на 1-ви декември, а полициската истрага кулминираше со откривање на закопаните тела на двете жртви кои биле ликвидирани со куршум во глава.
Првоосмничениот Палевски уште тогаш беше избеган, а турската полиција го откри и уапси по меѓународна потерница во градот Баликесир. Оттогаш, 5 месеци е во екстрадициски притвор во турски затвор.
Уште 4 лица се осомничени за двете убиства и грабнувањата, а меѓу нив е и таткото на Вања, Александар Ѓорчевски кој од затворски е префрлен во домашен притвор.
Миомир Серафиновиќ
Министерот за правда Кренар Лога потврди дека е дозволена екстрадиција на Палевски