Владеачката партија СДСМ смета дека државата навремено ги презема сите неопходни мерки за заштита на стандардот на граѓаните. Додаваат дека заедно со коалицијата работат на обезбедување на соодветно количество енергија и храна во пресрет на една од најтешките зими поради глобалната економска и енергетска криза.
– Зголемено е домашното производство на струја, се ставаат во функција сите расположливи капацитети и енергетски потенцијали, како и од нови обновливи извори на енергија. Со последната одлука, обезбедени се нови 50 милиони евра на ЕСМ, да може дополнително да го зголеми производството, а на сила се и мерките за заштеда на струја, велат од партијата.
Од таму нагласуваат и дека државата обезбедува субвенционирање на 80% од цената на сметката за струја за граѓаните, како и дека со ребалансот на Буџетот се издвоени 76 милиони евра за нови мерки за помош.
Од опозициската ВМРО-ДПМНЕ пак на став дека доколку власта домаќински работела ќе се спречело зголемувањето на цената на струјата и немало да дојде до најавеното ново зголемување во декември.
– Состојбата со енергетиката во Македонија е катастрофа поради криминалот на власта. Домашното производство на струја во време на антимакедонската СДС е намалено за 3 терават часови, а неопходните количини граѓаните и стопанството скапо го плаќаат од увоз. Македонските фирми сега плаќаат и до 800 евра за мегават-час, што е поскапо од сите компании во регионот, а енергетски капацитети во моќност од 400 до 500 мегавати стојат неискористени, обвинуваат од ВМРО – ДПМНЕ.
Според нив власта реши да го полни џебот на трговците со струја и да прави милионски штети на буџетот.
Заради ваквото работење, велат од опозициската партија, државните енергетски компании станаа загубари, а поради високите цени граѓаните и стопанството се донесоа до питачки стап.