Вицепремиерот Артан Груби веќе почнал да ги гаси сијалиците зад себе во неговото министерство, а ги проверува и другите. Денеска во Арачиново, каде отвораше водоводна мрежа, немаше порака до арачиновци, но им порача на останатите граѓани и институциите да штедат на струја.
За Груби не е голем трошок одењето на владината делегација од стотина лица на Самитот на Отворен Балкан затоа што, како што рече, Белград е блиску, а се прави промоција на државата.
Во меѓувреме, продолжија обвинувањата од лидерот на ВМРО ДПМНЕ, дека граѓаните и ЕЛЕМ, денешно ЕСМ, се пљачкаат преку ноќните вишоци на струја. Од податоците кои денеска ги пласираше на фејсбук, се гледа дека ЕСМ/ЕЛЕМ распишале оглас за продажба на ноќни вишоци на струја за периодот од 1 до 5 август, од 2 до 7 часот во вкупна количина од 1250 мегават часови, продадени по цена од 245 евра за мегават час. За истиот тој период цената на струјата на референтната берза е 372 евра за мегават час, со што е постигната разлика од 158.550€, за кои тврди дека завршуваат во нечии џебови.
Ова не е првпат Мицкоски да обвини за кражба од продажбата на ноќните вишоци. Од минатиот месец, постојано објавува податоци, а СДСМ му враќаат со истиот одговор.
Николова повтори дека, Владата презема мерки за заштита на стандардот на граѓаните и обезбедување на соодветно количество енергија и храна за престојната зима.
Далиборка Демјанска Цветановска