Десетгодишно дете загина, а 20-тина лица се повредени во руските напади во Харков кои продолжија и утрово. Автомобили во пламен, поцрнети фасади, уништени згради, искршени прозорци беа сликите кои ги видоа жителите во еден од најмасовните ракетни напади врз градот на североистокот на земјата од почетокот на руската инвазија. Украинската полиција соопшти дека се регистрирани два воздушни удара во Харков и според прелиминарните податоци станува збор за руски проектили од типот Искандер. Според локалните медиуми, во моментот на нападот не се огласиле сирените за воздушна опасност.
Денешните руски напади врз Харков се продолжение на вчерашните во кои загинаа најмалку 51 лице. Проектили завршија во продавница и угостителки локал во село Гроза, во областа Харков, во момент кога во нив имаше собрано многу луѓе на комеморација за нивни сограѓанин.
Рускиот претседател, говорејќи пред Меѓународниот дебатен клуб „Валдај“ во Сочи, изјави дека Западот го загубил чувството за реалност и ги минал сите граници. Тој го повтори ставот дека Русија не започна војна, туку се обидува да ја заврши. Истакна дека во случајот не станува збор за борба за територија, туку за безбедносни гаранции за Русија и руска држава.
Путин, исто така, нагласи дека никој при здрав разум не би помислил да употреби нуклеарно оружје против Русија бидејќи, како што рече, никој не би го преживеал рускиот одговор.
Сашко Димовски