Денови на НАТО во Острава, протест против Европската Унија и НАТО во Прага. Илјадници Чеси попладнево ги наполнија Вацлавскиот плоштад во главниот град на протест против коалициската влада на десниот центар со премиерот Петар Фиала. На настанот во организација на вонпарламентарната партија „Право, почит и професија“ се собраа над 10.000 граѓани кои изразија револт од, како што истакнаа, „скапотијата на Фиала, Европската Унија, САД, НАТО и Украина“. Меѓу барањата на демонстрантите беше оставка од владата поради високите цени на енергенсите, како и запирање на војната во Украина.
Организаторот на протестот, Јидрих Рајхл, кој себеси се смета за чешки Доналд Трамп, ја обвини владата на Фиала како најодговорна што Чесите плаќаат скапа струја, гас и нафта, но и дека Чешка е единствената земја која не се вратила на нивото пред пандемијата на ковид-19. Тој, исто така, обвини и за недостиг на на лекови, за примањето на украински воени бегалци и за испораките на оружје за Украина.
Протестот ги обедини екстремната десница со силите на крајната левица и беше трет таков протест во Прага во оваа година, организиран од новата политичка партија на чешката политичка сцена. Некои од демонстранти побараа земјата да излезе од НАТО.
На аеродромот Мошнов во Острава, пак, се собраа 100.000 граѓани на традиционалната дводневна манифестација „Денови на НАТО“. Премиерот Фиала ја истакна важноста од членството во Алијансата и безбедностните гаранции што го има земјата, а не биле случај во минатото.
Сашко Димовски