Домашното жито скапува додека државата увезува од странство. Станува збор за околу десет илјади тони кои иако по намалена цена, не се откупуваат. Од Националната федерација на фармери побараа забрана за увоз на пченица, за да може да се откупи нашата. На сметка на домашното жито, од странство се увезува и за десет денари поскапо. Според договорот објавен на Бирото за јавни набавки склучен во јануари за три месеци којшто веќе е истечен, цената на чинење изнесува 26,8 денари по килограм, со пресметан Данок на додадена вредност. Следен тендер ќе биде објавен во мај, за количина од пет илјади тони.
- „Ние уште лани и во годините пред тоа побаравме откупот на пченица за стоковите резерви да почне од денот кога почнува жетвата во Македонија и да се откупи од нашите производители, а не од странство. Кај нас е по 19 денари, а јас имам некоја информација дека е донесена пченица по 28 денари за Државните стокови резерви. И сега, Директоријатот за стокови резерви ќе почне да дава на млинарите за една ептен ниска цена и тогаш ќе падне и цената за нашата држава. Бараме помош од Министерството за земјоделство, а тоа значи да се забрани увоз на пченица и да може да се откупи нашата пченица,“ рече Мемет Синани – Член на Управниот одбор на Националната федерација на фармери.
Од каде и колку се увезува, нема конкретни информации. Македонија најмногу работи со Србија, но можеби се увезува пченица и од Украина коментираат земјоделците. Министерот за земјоделство Николовски ги удостои фармерите со присуство на годишното Собрание на Националната федерација, но не и медиумите со изјава пред камера.
Од Царина во одговор за Телма информираат дека во оваа и во изминатата година, најмногу увоз на пченица има од соседството.
- Царинска Управа: „Во 2022 и 2023 година најмногу увоз на пченица во Република Северна Македонија има од Република Србија. Во последните три месеци најмногу увоз на пченица има од Република Србија, со вкупна количина од 13.371 тони.“
Мемет Синани од Федерацијата на фармери ги анализира и цените на производите кои се пласираат на пазарот. За јавноста прескапо е да се пазари по сѐ повисоките цени, а фармерите велат дека нема друг избор.
- „Имаше некои изјави дека земјоделските произвоби биле многу скапи. Земјоделските производи не се скапи, туку земјоделецот не може да ги покрие своите трошоци. Патот од производство до краен потрошувач цената се зголемува за трипати. Ако доматот е откупен за 50 денари, ќе стигне и до 120 или 150 денари на тезга,“ рече Мемет Синани – Член на Управниот одбор на Националната федерација на фармери.
Земјоделците алармираат и дека ниту половина од авансот за субвенции не им е исплатен, иако годинава беше промовиран новиот модел на субвенционирање.
Петар Догов