Зелениково и велешко засега се безбедни од поплави, но опасноста не е мината. Излевањето на Вардар е стопирано и нема опасност за куќите, иако во Зелениково сè уште има излеана вода на земјоделско земјиште околу 15 до 20 метри надвор од коритото на реката.
Синоќа се закануваше излевање и кон куќите, по што веднаш е побарана помош од ЦУК.
Центарот за управување со кризи (ЦУК) синоќа побара од подружниците на ЕЛЕМ и ЕСМ, од браните да се испушта што помалку вода, а производството на електрична енергија да биде контролирано. Исклучена беше хидроелектраната „Св. Петка“, а во ХЕЦ „Козјак“ е оставен да работи само еден агрегат, со цел да се намали нивото на реката Вардар. Оваа состојба ќе продолжи и денеска, поради опасноста од нови врнежи.
Од ЦУК апелираат и доколку граѓаните забележат опасност од излевање, да пријават кај нив или на бројот за итни случаи 112.
Тамара Марковска