Иако приватниот Факултет за бизнис економија не работи од октомври лани, зашто по налог на основачот, в.д. директорката ги отпушти професорите, Агенцијата за квалитет во високото образование сеуште не констатирала дека високообразовната установа не ги исполнува условите за работа и дека и се одзема акредитацијата. Ваков одговор од министерот за образование Шаќири добивме пред еден месец, но и денеска.
До сега не е доставен одговор од страна на Агенцијата за квалитет во високото образование и очекувам оваа недела да доставам дополнителен допис, дали веќе ги имаат тие информации, вели министерот шаќири.
А, од Агенцијата велат дека извештајот од Просветен инспекторат по вонредниот надзор го добиле на крајот на октомври .
Извештајот е испратен до Агенцијата за квалитет во високото образование. Потоа таа го испрати до Одборот за акредитација, а тој го проследи до Одборот за евалуација. Се очекува на седницата во последната недела од јануари Одборот за акредитација да се произнесе по одговорот на Одборот за евалуација, рече директорот на Агенцијата за квалитет во високото образование Агим Рушити.
Одземањето на акредитацијата на факултетот ќе отвори простор студентите да бидат преместени на други универзитети, а не сами да се снаоѓаат. Во меѓувреме, факултетот без професори, противзаконски отвори оглас за прием на нов наставен кадар, а МОН не го поништи огласот, велат отпуштените професори. Според нив, без Наставнички совет, била формирана комисија составена од професори од Свети Николе, од битолскиот државен и од Штуловиот универзитет кои ги потпишале рецензиите на двата примени професори, но решенијата за работа останале непотпишани зашто минатиот месец почина в.д. директорката на факултетот.
Сотир Трајков