Градоначалникот на Центар тврди дека со Предлог-деталниот урбанистички план за централното градско подрачје „Мал ринг“ ќе се спречи да се комплетира проектот „Скопје 2014“.
Неизградените споменици од проектот никогаш нема да никнат онаму каде што се предвидени и наместо нив ќе има зеленило. Згради со намена А2 за домување, впишани во претходниот план сега ќе се пренаменат и ќе бидат дадени на државни институции што се занимаваат со култура.
Вчера, пак, од Асоцијацијата на архитекти на Македонија побараа градоначалникот Богдановиќ да го повлече Предлог–детaлниот урбанистички план за „Мал ринг“ за кој денес се одржа јавна презентација.
Сметаа дека јавна презентација не смее да има се додека спорните објекти не бидат целосно исфрлени.
„Планот којшто го работиме односно којшто денес го презентираме не го правиме за да протуркаме нешто или како што се кажуваше да легализираме, туку напротив, баш одредени работи коишто ги правиме со цел дел по дел да отстрануваме од тој проект „Скопје 2014“. Само да напоменам, овој план е менуван три или четирипати во една година ако не се лажам“ изјави Саша Богдановиќ, градоначалник на Општина Центар.
Дел од архитектите присутни на јавната презентација побараа од Општина Центар да дејствува порадикално и да урне некои од објектите.
Во овој Предлог-ДУП се стопира и се брише незапочнатото, а се отстрануваат и насоките од претходниот План, за тоа фасадите да бидат во стил барок и другите карактеристични стилови.
„Мора некои работи да се урнат за да се реши радикално проблемот затоа што друго решение нема. Овде имате брут-процент на изграденост 73,4“ изјави Сања Раѓеновиќ Јовановиќ, архитект.
За градби од проектот „Скопје 2014“ во моментов има 29 постапки во обвинителството. Богдановиќ уверува дека ќе интервенира во деловите од планот за катната гаража кај Собрание, „Шпанските скали“, споменикот „Мајка Тереза“. Но, сето тоа откако ќе завршат процесите.
Петар Догов