Минатата година се поднесени 166 предлози на закони од кои 130 биле по скратена постапка. 35 закони се поднесени со европско знаменце, а и од нив 22 биле по скратена постапка. Најчест подносител на закони со европско знаменце и по скратена постапка е министерството за финансии. Второ е Министерството за информатичко општество, а трето министерството за транспорт и врски. Со повеќето закони, не е дадена анализа на причините поради кои се бара усогласување со европското законодавство.
„Во однос на законите од пакетот Бехтел и Енка, Академија за судии и јавни обвинители и КЗ во ниту еден случај овие закони не смееле да бидат процесуирани со европско знаменце затоа што не ги исполнуваат формалните критериуми. А ова понатаму повлекува дека истите закони не биле разгледувани на соодветни матични комсии коишто се многу постручни за да ја ценат материјата којашто овие закони ја регулираат. И секако ваквите закони и на овој начин имаат импликација врз правниот поредок и врз буџетот на државата“ изјави д-р Бојана Наумовска, ИСППИ.
Од институтот за социолошки и политичко правни истражувања потсетуваат дека, согласно деловникот, претседателот на Собранието е тој кој ја прегледува документацијата, ги прифаќа и проследува законите со европско знаменце.Оттаму, велат дека и допуштањето на ваквите злоупотреби значи и откажување од контролната функција што треба да ја има врз владата.
Ги анализираа и досегашните извештаи на Европската комисија, кои со секоја година се се` поостри.
„Извештајот од 2023 година којшто, според мене, е многу страшен. Значи тоа е директен шамар на се она што претставува законска процедура во собранието и употреба на европското знаменце“, изјави проф. Мирјана Најчевска од ИСППИ.
Анализата на неколку држави во Европа покажува дека, скратената постапка не е невоообичаена, но се врши под точно определени услови. Генерално, усогласувањето со европското законодавство оди по редовна постапка.
Далиборка Демјанска Цветановска