Минатата недела најавија отпор, а денес остануваат цврсто на ставот. Синдикалците од Контрола на летање не отстапуваат од планот да штрајкуваат на 25 декември и на Нова година. Имаат еден услов – повлекување на огласите за вработување, кои според нив се косат со договорт на вработените и менаџментот на М-НАВ.
Синдикалците и директорот постигнаа договор пред два месеци. Главно барање на синдикатот беше огласите за вработување да не траат само три дена како досега, за да ги видат само наместени партиски кадри, туку минимум 10 дена, за да може да се пријават и непартиски кандидати со соодветно образование. И министерот за транспорт вети дека ќе се погрижи да биде испочитуван договорот помеѓу двете страни.
- „Тоа што беше договорено и поради коешто минатиот пат го ставивме штрајкот во мирување, тие повторно го прекршија. Излегоа огласи за вработување на лица за коишто беше договорено дека нема да се вработуваат бидејќи немаме потреба од таков кадар. Не ги почитуваат роковите коишто беа договорени од минимум десет работни дена за да им се даде шанса на што поголем број од државата да го видат огласот, да соберат документи и да конкурираат“ – Александар Тасевски – Претседател на синдикатот на Контрола на летање М-НАВ.
На веб-страницата на Агенцијата за вработување беа објавени огласи од М-НАВ, кои траат два дена – од 14 до 16 и од 15 до 17 декември. Во нив се бара самостоен советник за кадровски прашања и воздухопловен навигатор. Синдикатот на М-НАВ нотира дека еден од огласите е со траење од три дена, од кои два се сабота и недела. Синдикалците тврдат дека луѓето коишто М-НАВ сака да ги вработи се кадар од несуштински дејности и дека станува збор за партиски луѓе, а дел од нив и роднински поврзани. Директорот на Контрола на летање во краток телефонски разговор за Телма вели дека нема прекршувања на законот и дека со одлука на Влада се вработуваат нови луѓе. Дополнително, најави средба со синдикатот.
Петар Догов