Скопското обвинителство отвори истрага против пет лица кои се сомничат за кривичното дело „трговија со дете“. Осомничените, на возраст од 21 до 39 години, во временскиот период од месец август до 19 септември минатата година, на различни локации, користеле сексуални услуги од малолетничка.
„Националната единица за сузбивање на криумчарење мигранти и трговија со луѓе при Министерството за внатрешни работи, врз основа на издадени судски наредби од Основен кривичен суд Скопје, на 14 јануари изврши претрес во дом и други простории на осоничените на подрачјето на Кавадарци. Петтемина осомничени беа лишени од слобода и изнесени пред Судија на претходна постапка при Основниот кривичен суд Скопје, кој на предлог на јавниот обвинител, со Решение им определи мерка притвор во траење од 30 дена“, се вели во соопштението на Обвинителството за гонење на организиран криминал.
Дваесет годишникот за кој веќе се спроведува истражна постапка за сторено кривично дело „Трговија со дете“, со употреба на физичка сила и закани, како и психолошко насилство, ја принудувал малолетничката на вршење полови дејствија и да дава сексуални услуги на осомничените за паричен надоместок од 1.000 до 2.000 денари.