„Крпен живот“. Ваков живот живеат 500 семејства кои поради милионскиот долг од ЈСП останаа без плати. Велат на раб на издржливост се затоа што откако се намалила, па запрела исплатата на неделните паушали, превозот прво го покривале сами, од сопствени заштеди, со кредити и други позајмици, а сега се препуштени на случајот.
Два од трите услови на премиерот Ковачевски се прифатени. Град Скопје да биде дел од процесот на преговори и автобусите на приватните превозници да не го блокираат функционирањето на градот. Остана уште третиот. УЈП да го достави извештајот до Владата за работењето на ЈСП, Слобода превоз и Макекспрес. Но според информации на Телма премиерот не ни побарал од управата да му го достават извештајот, додека пак тој на прашање на Телма одговори дека ги чека извештаите за старт на преговорите.
Како службени лица, сме должни како даночна тајна да ги чуваме сите документи, информации, податоци или други факти за даночниот обврзник до кои сме дошле во даночна, прекршочна или судска постапка, а во даночна постапка влегува и постапка по надворешна контрола при чие спроведување сознаваме суштински информации/службени информации, факти, докази по кои следува натамошниот исход од постапката и сoгласно кое начело можеме да дадеме/доставиме информација само кога тоа од УЈП ќе се побара од страна на надлежен орган, велат од ујп.
Проблемот кој требаше да биде само должничко-доверителен а стана граѓански заглави низ институционалните лавиринти. Телма дознава и дека во ЈСП контрола врши Финансова полиција и одделението за инспекција за патен сообраќај и инспекција за патишта од град Скопје. Приватните превозници со нивните барања ја чекаат трио средбата во Влада за решавање на проблемите, која стана историска. По нив чекаат и граѓаните заглавени на автобуските постојки и гужвите во автобусите на ЈСП, кои се со редуциран возен ред.
Симона Петровска