Агенција за разузнавање, Комисија за спречување и заштита од дискриминација и Агенција за млади и спорт се на дното на табелата меѓу институции со најнетраспарентни интернет страници, стои во извештајот на Агенцијата за слободен пристап до информациите од јавен карактер.
Од максимални 52 бодови нула има Агенција за квалитет и акредитација на здравствени установи, a само еден бод има Агенцијата за примена на јазикот што го зборуваат најмалку 20% од граѓаните во РСМ.
Од 120 институвии на 66-то место е рангиран Претседателот на Република Северна Македонија со 33 бода за транспарентна веб страница.
Цел на мониторингот биле 22-те категории на информации, согласно член 10 од Законот за слободен пристап до информации од јавен карактер и нивното доследно објавување на веб-страните на имателите на информации. Во тие категории се наоѓаат податоци од адреси, телефонски броеви и мејлови на институциите, па до објавените закони, правилници, стратегии, годишни буџети, ревизии и огласите за јавни набавки.
Од 120-те анализирани институции, само 25 имале повеќе од 40 бода, односно влегле во категоријата „високо ниво на транспарентност“. На врвот за 2022 година е Министерството за земјоделство, шумарство и водостопанство со 49,5 бодови, додека на првите пет места се уште и Министерството за одбрана, Министерството за финансии, Фондот на пензиското и инвалидското осигурување и Државниот пазарен инспекторат.