Дивоградбите кои ќе се конфискуваат со правосилна одлука општините ќе имаат можност да ги земат во нивна надлежност и да ги пренаменат. Бесправно изградените објекти локалните самоуправи не ќе можат да ги продаваат, туку само да ги отстапат на други органи на власта, или на здруженија за заштита на социјално ранливи категории граѓани.
Доколку не го легализираат конфискуваниот објект, општините имаат рок од 6 месеци да го срушат. Овој член во Законот за конфискација на имот во кривична и прекршочна постапка, кој е донесен во Собранието, е по иницијатива на Општина Центар.
Овој закон не се однесува за дивоградби кои се на приватни земјишта за кои се водат постапки за уривање или се води постапка за легализација. Следни чекори се констатирање на дивоградбите кои ќе бидат зона на интерес, се работи за големи објекти кои носат профит кои се градат или се изградени на државно земјиште, вели Горан Герасимовски, градоначалник на Општина Центра.
Агенцијата за управување со конфискуван имот со одлука на Владата одземената дивоградба ќе ја предаде во надлежност на Општината на чија територија припаѓа.
Герасимовски додава дека со новото законско решение, наместо огромни трошоци за уривање на нелегално изградените објекти, сега тие ќе можат да се пренаменат во пензионерски домови, клубови за млади, да се вдомат социјално загрозени семејства или да се користат за друго јавно добро.
Емилија Мисириевска