Загриженост за тоа дали Владата ќе направи сѐ за изборите да бидат фер и демократски, изрази денеска техничкиот министер за внатрешни работи Панче Тошковски, откако по неговото стапување на функција не му било овозможено да назначи нов началник на СВР Тетово. Тошковски и претходно се пожали дека од осум сектори за внатрешни работи, само во СВР Тетово, не можел да постави друго име, иако го имал тоа право согласно законот.
„Значи овие како Влада не дозволија не само мене, туку не дозволија и на дополнителниот. Не со име и со презиме туку со работна позиција, не дозволија промена на систематизација, којашто промена на систематизација ќе овозможеше поставување од моја страна началник, од страна на дополнителниот, дополнителен началник кој што требаше да го гарантира фер и демократскиот процес на територија на Тетово, Гостивар, Брвеница, Јагуновце и итн“, изјави Тошковски.
Тошковски притоа додаде дека од Владата се уште не добил правно образложение.
„Ми беше ветено дека ќе ми биде дадено правно образложение зошто Владата смета дека по закон го немам тоа право. Правно образложение не ми беше дадено. Ај можеби јас не заслужувам да добијам правно образложение. Може јас сум правник па треба сам да читам. На новинарите кои што се обратија да добијат одговор на прашањето, замислете Владата што кажа на отворена седница не биле дискутирани такви работи. Пазете сеа, ем шуто ем боде“, додаде Тошковски.
Тошковски претходно изјави и дека за опструкциите ги информирал ОБСЕ-ОДИХР и стратешките партнери. СВР Тетово ќе биде надлежно за изборите да поминат во најдобар ред во изборната единица 6 каде има речиси 278 илјади гласачи.
Марија Митевска