Скрининг механизмот за странски директни инвестиции е проект којшто го води Институтот за демократија „Сосиете Сивилис“ и финансиран е од САД. Прашање е што сакаме на краток рок и на подолг рок, истакна Зоран Јовановски, експерт, во вечерашната дебата на „Топ тема“ на ТВ Телма.
„На краток рок, ако запреме некоја инвестиција која со себе носи корозивен капитал и зад која најчесто стои странска држава. Таа преку некого вложува во земјата, неа не ја интересира профит или загуба, туку влегува за да стекне, наметне свое влијание“, изјави Јовановски.
Јовановски го објасни тоа преку пример со медиумите.
„Тоа значи да дојде некој во Македонија и да праша кои се телевизиите. Утре Телма, Сител, Алфа итн. ги купувам сите. Може ли тоа да се дозволи? – Смее ли тоа да се дозволи, бидејќи од утре тој ќе го креира јавното мислење во земјата. Бидејќи тоа е како ‘рѓа, нешто како корозивно за системот, ги слабее институциите, ја зголемува корупцијата, се намалува владеењето на правото, доколку го има се разбира, и во такви околности, амбиентот во кој што работат сите фирми во земјата станува полош. Апсолутно за сите“, рече Јовановски.
Тој илустративно го дообјасни тоа со пример „како во чиста река да влегува чист поток чија вода е кафеава и загадува“.
„Целта е да се оневозможи некој да го прави амбиентот за работа полош одошто е во моментот, поризичен во секој поглед. И на краток рок, можеби некоја инвестиција која што нема да помине и нема да придонесе да се загадува просторот, може ќе значи останување со помал влез на странски инвестиции, меѓутоа на подолг рок ќе ја добиеме и таа една афирмација во очите на странските инвеститори дека сме ревносни во тој поглед, внимаваме, сакаме амбиентот за работа да го направиме добар и да го држиме добар. На подолг рок тоа ги привлече повеќе странски инвеститори и тие ќе бидат од оние со некорозивен капитал“, вели Јовановски.