Министерот за одбрана на Израел, Јоав Галант го претстави планот за војната пред комитетот за надворешни работи и одбрана во Кнесетот во Тел Авив. Според него, целите вклучуваат елиминација на палестинската милитантна група Хамас, уништување на нејзините воени и владини капацитети и целосно отстранување на секаква одговорност што Израел ја има врз Газа со создавање на нов безбедносен режим во Појасот.
„Ние сме во првата фаза во која се одвива воздушна кампања, а подоцна и копнени маневри со цел уништување на оперативците и оштетување на инфраструктурата за да се порази и уништи Хамас“, рече Галант.
Втората фаза, како што нагласи, ќе продолжи со борби со послаб интензитет, бидејќи единиците работат на „елиминирање на џебови на отпорот“.
„Третиот чекор ќе биде создавање на нов безбедносен режим во Појасот Газа, отстранување на секаква одговорност на Израел за секојдневниот живот и создавање на нова безбедносна реалност за граѓаните на Израел и за граѓаните во подрачјето околу Газа“, истакна Галант.