Снимките од дрон посведочат за ужасните сцени од пожарот кој свадбената прослава ја претвори во трагедија. Најмалку 114 лица загинаа, а околу 200 се повредени во несреќата што се случи во ирачка провинција Ниневија. Меѓу загинатите е и младиот брачен пар кој според очевидци не го доиграл својот прв свадбен танц. Првите извештаи покажуваат дека пламените јазици кои ја зафатиле големата сала, биле предизвикани од огномет. Роднините на жртвите скршени од тага трагаат по телата на своите најблиски.
- Бараме, но нема ништо. Нема тела. Ги пребаравме болниците во Мосул, форензичкото одделение, но ништо. Нема тела. Тие исчезнаа, нема ништо.
- Брат ми и жена ми се мртви, но и две од моите ќерки се исчезнати. Го пребаравме целиот Мосул и ги објавивме нивните слики, но ништо. Се колнам во Бога, сите седевме овде, а жена ми отиде во бањата, и таа воопшто не беше изгорена, таа и брат ми воопшто не беа изгорени, туку само се задушија. Таа се задуши во бањата.
Градските власти соопштија дека огнот се раширил со огромна брзина па присутните во објектот немале големи шанси за да се спасат. Причината за тоа ја лоцираат во евтините и лесно запалливи градежни материјали со кои бил изграден објектот. Дополнително во салата немало ниту апарати за гасење пожар… Дел од гостите во изјава за медиумите сведочат дека за време на несреќата во објектот имало околу 900 гости.
- Повеќето од жртвите беа целосно изгорени. А некои со изгореници на телото од 50 до 60 отсто.
- Дојдов овде во болница и по некое време ми се јавија и ми рекоа дека 22 члена од моето семејство се изгорени. Така, дојдов овде и ги барав, а откако ги најдов, беа префрлени во Мосул бидејќи нивната состојба беше критична.
Обвинителството во земјата покрена истрага за случајот, од терен се собираат докази, се идентификуваат жртвите… Персоналот на објектот е приведен и со него се прават разговори за да се утврди одговорност за трагичниот настан.
Александар Петрески