Франција попладнево почна итна евакуација на дипломатскиот персонал и државјани од Нигер, објави Ројтерс. Станува збор за околу 100-тина луѓе кои треба да ја напуштат земјата по воздушен пат во соработка со нигерските сили. По нив полетаа три авиони од типот Ербас од југот на Франција. Налогот за евакуација го потврди и француската министерка за надворфешни работи, Катрин Колона. Француската војска, пак, соопшти дека нејзините 1.500 припадници остануваат во западноафриканската држава. Операција за извлекување на француски, но и други европски државјани од Нигер следува по воениот пуч во Ниамеј и соборувањето на претседателот Мохамед Базум.
Стапките на Франција ги следи и Шпанија чие министерство за одбрана информираа дека ќе евакуира 70-тина шпански државјани од Нигер. И италијанските власти објавија дека се подготвени да испратат авиони во Ниамеј за околу 90 Италијанци во главниот град Ниамеј и вкупно 500-тини во целата земја. Германија им порача на нејзините државјани да ја прифатат понудата на Франција и да го напуштат Нигер. Амбасадите на Италија и на Германија барем засега остануваат отворени во Нигер за учество во посредничките напори за излез од политичката криза во земјата.
Засега нема најави за евакуација на американски државјани од Нигер.
Додека дел од западните земји работат на евакуација на своите државјани од Нигер, Русија најави отворање на свои амбасади во две африкански земји. Рускиот премиер Михаил Мишутин денеска потпиша указ за обновување на руските дипломатски претставништва во Буркина Фасо и во Екваторијална Гвинеја. Такво нешто најави претседателот Владимир Путин на самитот „Русија – Африка“ што минатата недела се одржа во Санкт Петербург.