Министерот за образование и наука, Јетон Шаќири изрази поддршка за барањата на вработените во Државниот испитен центар (ДИЦ) кои штрајкуваат, но упати и јасна порака од Кавадарци претпладнево – државна матура ќе се полага на 27 мај за што, како што нагласи, ако биде потребно ќе бидат ангажирани вработени од ресорот со кој раководи.
„Ги поддржувам барањата, но мој конечен став е дека државната матура ќе се реализира на 27 мај како што е предвидено според рокот. Според податоците што ги добивам јас како министер, се прават сите подготовки да се полага државната матура. Ако е потребно од понеделник и вработени од Министерството за образование и наука ќе испратиме само за да се завршат работите“, изјави Шаќири.
За барањата на вработените истакна дека треба да дојде момент за нивно целосно реализирање.
„Знаеме дека станува збор за мал број на вработени, но причината е дека се чека системското решение со општиот колективен договор и после тоа може да има дискусија помеѓу директорката на Државниот испитен ценатр и вработените за реализација на нивните барања“, додаде Шаќири.
Од Сојузот на средношколци денеска, исто така, изразија поддршка за барањата на вработените во ДИЦ, но велат дека одржувањето на државната матура е законска обврска и државата е должна да ја спроведе во законски предвидениот рок.