Договорот постигнат во Охрид меѓу српскиот претседател, Александар Вучиќ и косовскиот премиер, Албин Курти, не се однесува за меѓусебно признавање на двете држави, туку за нормализација на односите меѓу нив, за да не може во иднина проблемот како со регистарските таблички да доведе до поставување барикади и да се заканува со дестабилизација на билатералните односи но и на поширокиот регион, изјави заменикот помошник на државниот секретар на САД, Габриел Ескобар во денешниот прес-брифинг организиран од Стејт Департментот.
Тој прецизираше дека постигнатиот договор, Соединетите држави, но и Европската Унија го сметаат за правно обврзувачки за двете страни и будно ќе ја следат неговата имплементација, независно од тоа дали двете страни потпишале некаков документ, испраќајќи јасна порака до Вучиќ, кој изјавуваше дека тој не потпишал ништо во Охрид, релативизирајќи го исходот со коментарот дека бил постигнат „некаков договор“ и фокусирајќи се пред се на фактот дека треба да се забрза процесот на формирање на ткн заедница на српските општини.
Овој договор е правно обврзувачки за двете страни. Иако не е потпишан, тоа е договор во секоја смисла, рече специјалниот пратеник и прецизираше дека тоа навистина значи – во секоја смисла.
Според него, шефот на европската дипломатија, Жозеп Борел, јасно стави до знаење дека страните се обврзале и дека спроведувањето на договорот ќе влијае на европскиот пат на двете страни.
Договорот е пат кон помирување на Србија и Косово. Важно е да разјасниме како ќе постапат двете страни. Имплементацијата мора да почне веднаш и двете страни ќе имаат корист од тоа. Сметам дека најважни се евроатлантските интеграции. Ќе направиме напредок само ако договорот почне да се применува што е можно поскоро, рече Ескобар.
Ескобар оцени дека за САД исклучително важно е дека договорот бил постигнат во Охрид, подвлекувајќи дека Македонија е пример за функционална мулти-етничка демократија, која го решила и билатералниот спор со Грција, во обид за деблокирање на евро-интегративниот процес, кој како што рече, Соединетите држави силно го поддржуваат, сметајќи дека местото на нашата држава е во Европската Унија.
Никола Илиевски