Советот за безбедност (СБ) на Обединетите Нации (ОН) усвои Резолуција која се однесува на итен прекин на огнот меѓу Израел и Хамас во Појасот Газа и моментно и безусловно ослободување на сите заложници.
Текстот на резолуцијата го предложија 10 непостојани земји членки, го поддржаа 14, а САД беа „воздржани“.
Во претходните обиди, постојаните членки на СБ вложуваа вето, со што оневозможија усвојување на поднесените резолуции за примирје во Газа.
Соединетите Американски Држави трипати досега вложија вето на нацрт резолуциите, додека Русија и Кина двапати блокираа американски предлози. Меѓутоа, поради сè поголем притисок, САД денеска решија да се воздржат од гласање и на тој начин да му овозможат на СБ да побара итен прекин на огнот за време на месецот Рамазан кој ќе трае уште две недели.
Во резолуцијата се нагласува и итна потреба за зголемување на приливот на хуманитарна помош и да се интензивира заштитата на цивилите во целиот Појас.