Туристи и локални жители се собраа пред лондонската Бакингемска палата, еден ден откако Кетрин, принцезата од Велс, јавно објави дека има рак и оди на хемотерапија.
Објавата уследи по неколкунеделни шпекулации за нејзиното здравје и за тоа каде се наоѓа.
Принцезата ја откри својата состојба во видео порака снимена во средата во Виндзор и емитувана во петокот.
Тоа се случи по немилосрдните шпекулации на социјалните мрежи уште од јануари, кога таа беше хоспитализирана поради неодредена операција на абдоменот.
Кејт побарала „време, простор и приватност“ додека се лекува од неодреден тип на рак кој бил откриен по, како што ја опишала, „големата“ операција.
Кејт (42) не беше видена јавно од Божиќ додека оваа недела не се појави видео од неа со нејзиниот сопруг, принцот Вилијам, наследник на тронот.
На него беа прикажани како одат од продавница која продава производи одгледувани на имотот на кралското семејство во Виндзор.
Веста е уште еден потрес за кралското семејство по објавувањето минатиот месец дека кралот Чарлс Трети се лекува од неодреден тип на рак, кој беше откриен при операција за бенигна зголемена простата.