Германија, Чешка и Полска нема да праќаат војници во Украина. Ова е потврдено денеска по изјавата на францускиот претседател, Емануел Макрон дека таква можност не е исклучена.
Генералниот секретар на НАТО, Јенс Столтенберг во изјава за АП порача дека Алијансата ја поддржува Украина, но не планира да испраќа копнени трупи.
Портпаролот на Кремљ, Дмитриј Песков, пак, одговори дека испраќањето на војници во Украина „не би било во интерес на Западот“. Притоа предупреди дека во таков случај би бил неизбежен директен судир меѓу Русија и НАТО.
Денеска во Париз беше одржан Самит на европските лидери чиј домаќин беше францускиот претседател Емануел Макрон кој по состанокот соопшти оти нема консензус за испраќање на војници на европските земји во Украина. Но, нагласи дека „ништо не треба да биде исклучено“.
„Во овој момент нема консензус за испраќање трупи. Ништо не треба да се исклучи. Ќе сториме се Русија да не победи“, изјави Макрон на прес-конференцијата по состанокот, пренесе „Ројтерс“.