Поранешниот пратеник од ДУИ, Зулфи Адили, и екс генералниот секретар на БЕСА, Абдуш Демири, се кандидатите предложени за да го пополнат испразнетото место во ДИК. Демири е поддржан од здружената опозиција, а Адили од новата партија на екс потпретседателот на БЕСА, Арјанит Хоџа, Европска демократска партија. Од движењето „Попули„ на Скендер Реџепи, одлучија да не поддржат ниту еден кандидат.
Адили од ДУИ премина во партијата на Г`зим Острени, која подоцна беше во коалиција со Алијанса за Албанците. Сега се претставува како независен, а како таков доби поддршка и од Хоџа, кој смета дека има право да предложи кандидат и покрај тоа што неговата партија никогаш не била на избори.
Од здружената опозиција жестоко реагираат на потегот на собранискиот спикер, кој им се обрати на сите претседатели на партиите на Албанците во опозиција, да се изјаснат за пополнувањето на ДИК. Го обвинуваат за манипулација и се повикуваат на член 2, став 10, од Изборниот законик,во кој стои дека, „опозицијата ја сочинуваат политичките партии во опозиција кои на последните избори за пратеници освоиле најмногу гласови.
Но, што и да одлучи Комисијата за избори и именувања, за избор на член на ДИК е потребно двотретинско мнозинство, што во оваа консталеција е невозможно да се постигне, доколку партиите не се договорат.Оттаму и движењето побара поддршка од меѓународните сојузници, особено од мисијата на ОБСЕ-ОДИХР, Мисијата на ЕУ во Скопје, како и од Амбасадата на САД, да преземат мерки за гарантирање фер и демократски избори.
Далиборка Демјанска Цевтановска