Уште еден поранешен припадник на косовската полиција од српска националност е уапсен во текот на ноќта на Косово. Најновото апсење доаѓа по косовската апликација за членство во Европската Унија што беше потпишана во средата и синоќешната, едногласна одлука, на владата во Белград со која се бара од КФОР да дозволи распоредување на одреден број на припадници на српските безбедносни сили на северот на Косово.
Како што јавуваат српските медиуми, ноќеска е уапсен Слаѓан Трајковиќ кому му едреден притвор. И тој, како и претходно уапсениот Дејан Пантиќ, се товари за терористички акти, изјави неговата сопруга за РТС.
Припадниците на косовската полиција од српска националност на почетокот на ноември ја напуштија службата, како и сите Срби во јавната администрација, поради незадоволство од одлуките на косовските власти, пред сè, дека никогаш нема да биде формирана Заедница на српски општини, иако е предвидена со претходно потпишаниот Бриселски договор.
Апсењето на Пантиќ предизвика револт меѓу мнозинското српско население на северот на Косово, што резултира со блокада на повеќе сообраќајници, протест кој влезе во седмиот ден.