Осум полицајци и еден цивил се повредени утрово во турската провинцијата Дијарбакир, кога автомобил-бомба експлодирал на автопат додека покрај него минувал полициски минибус. Министерот за внатрешни работи Сулејман Шојлу изјави дека две лица се приведени и оти се верува дека тие се одговорни за експлозијата.
„Во 05:10 часот утринава дошло до експлозија во паркирано возило, во моментот кога минувало полициско возило со кое се превезувале работници на работа во Дијарбакир“, изјави турскиот министер.
Канцеларијата на гувернерот на Дијарбакир соопшти дека во експлозијата нема сериозно повредени, но деветте лица кои се наоѓале во блиндираниот минибус се пренесени во болница на подетални прегледи. Експлозијата се случила на околу 10 километри јужно од центарот на Дијарбакир, најголемиот град во регионот.
Сè уште никој не ја презел одговорноста за експлозијата.