Првиот човек на полската полиција е ранет во неговиот штаб во Варшава при експлозија на подарок што го добил за време на посетата на Украина, објави попладнево полското Министерство за внатрешни работи.
Јарослав Шимчик го добил подарокот од еден од челните луѓе на украинските итни служби при престојот во Украина на 11 и 12 декември.
„Командантот е полесно ранет и од вчера е во болница“, соопшти министерството за инцидентот што се случил вчера попладне.
Засега е нејасно за каков подарок станувало збор. Полските медиуми јавија дека во експлозија во седиштето на полицијата е ранет Шимчик и оштетен е дел од покривот на зградата.
Полска веднаш реагирала до украинските сили со барање за релевантни објаснувања за случајот, се наведува во соопштението.