Битка за градежна парцела се води меѓу Општина Штип и АД за аеродромски услуги Аеродроми.
Претходната, но и сегашната локална власт на парцелата од 30 хектари сака да прави нова индустриска зона, додека пак Аеродроми сакаат да постават сончеви панели за производство на струја.
Земиштето е државно и се протега меѓу приградската населба Три Чешми и Калимерово.
Штипскиот градоначалник, Иван Јорданов порача дека оваа локација на која има развиена инфраструктура и е на самиот влез и излез на градот Штип не треба да се постават фотоволтаици.
Индустриската зона е на барање на бизнис секторот, бидејќи Штип нема големи парцели во старите зони за изградба на фабрики.
Општината почнала со изработка на нов Детален урбанистички план, но АД „Аеродроми“ веќе иницирале пренамена на земјиштето.
Лани ова акционерско друштво во државна сопственост го променило и статусот, освен основната дејност поврзани со транспортот, добива и две нови – производство и трговија со струја.
„Спорот треба да го реши Агенцијата за просторно планирање. Од таму од нас се бара мислење за поставувањето на сончевите колектори, ние сме против но сепак конечниот збор треба да го има Агенцијата“ – велат од Општина Штип
Интересот за изградба на фотоволтаици е огромен, фотоволтаични централи се очекуваат во атарите на селата Чардаклија, Калимерово, Криви Дол, Сарчиево и Љуботен.
Во близина на Три Чешми, но на сосема друга локација треба да никне фотоцентрала со моќност од 10 мегавати.
Викторија Јованова