Властите во источна Либија започнаа кампања за вакцинација по разорните поплави што ја погодија земјата. Надојдените води по пукањето на две брани однесоа илјадници човечки животи, илјадници Либијци се водат како исчезнати. Регистрирани се и први случаи на труење и дијареа што ги зголеми стравувањата од ширење на епидемии во погодените подрачја. Во тек е контрола на сите извори на вода во и околу Дерна, а упатен е апел до населението да користи само вода во шишиња која се испраќа во рамки на хуманитарната помош што ја праќаат многу земји.
Министерот за здравство на источна Либија соопшти дека бројот на загинати само во Дерна достигнал 3.252. Но, истовремено, истакна стравување оти билансот на жртви би можел да биде далеку поголем, бидејќи не исклучува можност дополнително да бидат пронајдени загинати лица. Дополнителен проблем, според него, би можело да биде и поплавите да разместат експлозивни направи кои се поставени при неодамнешните конфликти во земјата.
Паралелно со потрагата по преживеани и кампањата за вакцинација, либиските здравствени власти спроведуваат и дезинсекција во областите што беа погодени од поплавите. Спасувачките тимови и натаму копаат по калта и урнатите куќи и згради. Либиската „Црвена полумесечина“ досега потврди 11.300 смртни случаи и истакна дека над 10.000 луѓе се водат како исчезнати. Главниот обвинител на Либија, пак, најави истрага за причините за уривањето на браните кои се изградени во 70-тите години од минатиот век.
Сашко Димовски