Три западноафрикански држави во кои на власт се воени хунти – Нигер, Мали и Буркина Фасо формираа безбедносен сојуз, со ветување за меѓусебна помош и поддршка во случај на бунт или надворешна агресија.
„Секој напад на суверенитетот и територијалниот интегритет на една или повеќе договорни страни, ќе се смета за агресија на сите“, се наведува во Повелбата на пактот познат како Сојуз на државите од Сахел, пренесува „Ројтерс“.
Во документот се наведува дека државите ќе си помагаат меѓусебно „поединечно или колективно, вклучително и со употреба на вооружени сили“.
Мали, Нигер и Буркина Фасо, заедно со Чад и Мавританија, беа дел од здружените сили Г5 на Сахел кои имаа поддршка од Франција. Но, Мали ја напушти организацијата по воениот удар во земјата, а соборениот претседател на Нигер, Мохамед Базум во мај изјави дека „силите се мртви по заминувањето на Мали“.
Франција беше принудена да ги повлече своите трупи од Буркина Фасо и Мали. Официјален Париз е во тензични односи и со хунтата во Нигер.