Цела ноќ траеа спасувачките операции во погодените региони од поплавите предизвикани од невремето Даниел, со кои се соочува Грција. Градот Волос и областа Пелион во Тесалија се најпогодените области.
Во денешната операција учествува и хеликоптер „Шинук“, кој непрекинато лета до и од селото Влохос, од каде вчера имаше драматични повици за спасување.
Од вторникот утрината извршени се вкупно 1.881 спасување – евакуација на лица, кои се пренесени на безбедни места, а 110 вклучуваа и воздушно спасување во поплавените села Кардица и Трикала. Според локалните власти, во текот на денот спасувачите ќе се фокусираат на евакуација на осум села во Кардица, каде се заробени луѓе кои избегале на покривите на куќите и на повисоки места за да се спасат.
Силното невреме проселедено со катастрофални поплави досега зема шест жртви, но други шест се водат за исчезнати. За спас чекаат стотици луѓе, домовите им се уништени на илјадници семејства, уништена е и витална инфраструктура, а посевите се целосно поплавени. Штетата допрва ќе се утврдува велат надлежните, но засега можно е да е трипати поголема од последните поплави во 2020-та кога поплавите направија 700 милиони евра штета.