Проширувањето на Европската унија беше тема на Самитот на Европската политичка заедница. Премиерот Димитар Ковачевски, уверува дека подготвеноста на Унијата за прием на нови членки никогаш не била поголема.
Без уставните измени кои се услов за македонските евроинтеграции, вели Ковачевски, Македонија ќе добие изолација наместо интеграција. За средбата со опозицискиот лидер Христија Мицкоски вели ќе зборува откако ќе се случи, но ја отфрли можноста за предвремени избори, доколку уставните измени не поминат во Собрание.
Инаку, главна тема на Самитот беше војната во Украина.
Симболично, Самитот се одржа во замокот Мими, во Молдавија, на 20-тина километри од границата со Украина. Тоа за европските лидери е уште една силна потврда дека Европа останува обединета во поддршката за Украина и ќе работи на решенија да се врати мирот на континентот.
Ова е втор самит на Европската политичка заедница. Идеја на францускиот претседател Емануел Макрон што тој ја изнесе лани. Намерата е да функционира како неформален форум за разговори и соработка со европските партнери за теми од заеднички интерес. Следниот самит е закажан за октомври во Шпанија.
Од Молдавија за Телма, Марија Дивитарова