Претресите во Идризово кои резултираа со запленета дрога, ножеви, пари и мобилни телефони, следува по низата забелешки кои министерот за правда Никола Тупанчевски ги добил од претставници на Комитетот за превенција од тортура. Освен за условите во затворите, јасно му посочиле дека на одредени директори местото не им е на чело на затворите. Тупанчевски не сакаше да открие дали менаџментот на затворот Идризово бил посочен.
Како дрога и ладно оружје завршиле зад навидум непробојните тврдини со многу решетки, директорот на Управата за извршување на санкции и министерот велат истрагата тоа ќе го покаже, а никој нема да биде поштеден од одговорност.
Во координираната акција во Идризово учествувале 65 специјалци од ЕБР, уште 30 полицајци од крим-техника и над 40 затворски чувари и полицајци од други затвори. Претресите се вршени со налог од судија, со конкретно име и презиме на осуденик, келија и затворско крило.
Од извори блиски до истрагата Телма дознава дека биле претресени келии и затвореници и во затворениот дел и меѓу осудениците со доживотни казни за „Диво Насеље“, но и кај затвореници во полуотвореното одделение. Кај еден затвореник биле најдени три ножа, додека друг имал над илјада евра, иако според правилниците било дозволено да имаат најмногу 6.000 денари за цел месец, велат нашите извори. Одземените телефони се вештачат за да се провери дали затворениците контактирале со припадници на затворската служба
Елена Ивановска Мукоска