Од утре стартува гласањето за двојните избори. Правото на глас ќе го искористат болните и немоќни лица во домашни услови, а утре избирачките места во затворите во земјата ќе се отварат во 7, а ќе се затворат во 19 часот. За вториот круг на претседателските и за парламентарните избори зголемен е бројот на пријавени болни и немоќни лица, кои утре ќе ги посетат членовите на избирачките одбори, за да гласаат во домашни услови. Според податоците на ДИК утре за претседателските избори ќе гласаат 11.123, а за Парламентарните избори бројката на болни и немоќни лица е поголема за 102 избирачи или ќе гласаат 11.225 болни и немоќни лица. И во Штип бројката за двојните избори е зголемена за 50 болни и немоќни лица, со што утре во домашни услови ќе гласаат 208 лица.
На 8 мај на избирачките места ќе има две гласачки кутии, едната за избор на нов претседател, а втората за избор на пратеници. Гласачите ќе имаат право само еднаш да пристапот до избирачкото место.
На 8 мај, на вториот круг од претседателските избори право на глас имаат 1.814.317 избирачи, додека на парламентарните избори 1.815.350 избирачи. Разликата во гласовите е 1033, генерално поради граѓани кои стекнуваат полнолетство. Во посебните изводи од Избирачкиот список за лица кои поднеле пријава за гласање во дипломатско конзуларните претставништва или конзуларни канцеларии се запишани 2.569 избирачи, а во затворите или во притвор 2.147 избирачи. Запишани се и 534 избирачи згрижени во установите за вон семејно згрижување, а во Избирачкиот список запишани се и две внатрешно раселени лица.
Викторија Јованова