Каратистите на карате клубот „Макпетрол“ кои се дел од македонската репрезентација заминаа на Европското првенство во Задар, Хрватска, што ќе се одржи од 8 до 12 мај. Карате клубот Макпетрол има најмногу репрезентативци во националниот тим со вкупно осуммина.
Петмина ќе настапат во борби во поединечна конкуренција, а тоа се Петар Заборски, Петар Спасеновски, Данило Божовиќ, Симона Заборска и Ангела Мојсовска. Во борби екипно ќе настапат уште тројца, а тоа се Викторија Јовановска, Витомир Трајковски и Стефан Стојановиќ.
Финалната програма од подготовките, „макпетролци“ ја реализираа изминатата недела во Струга и максимално подготвени заминаа за Задар на континенталниот турнир.
„Во реализацијата на програмата за успешна подготвеност, нашите сениори од самиот почеток на годината, учествуваа на сите највисоко рангирани првенства и светските карате премиер лиги. Завршните подготовки, се исто така многу значаен сегмент за правилно темпирање на формата, како финален дел од планот за подготвеност на спортистите за ова првенство“, изјави тренерот на „Макпетрол“, Бошко Заборски.
На Европското првенство во Задар ќе учествуваат вкупно 600 каратисти од 50 земји.