Господин Поповски за еден ден ја удвои поддршката за кандидатурата за претседател. Од 19 потписи до завчера, од синоќа има 40. На табелата на ДИК слабо котираат и кандидатката од партијата Десна, Зорица Цветковска која има 140 потписи, како и Ѓорѓи Манасков со 267 и Вело Марковски со 924 потписи. Неизвесна е трката и за Мерсиха Смаиловиќ од бошњачката заедница, која стигна до 887 потписи.
Градоначалникот на Карпош, Стевчо Јакимовски, го засилил собирањето на потписи пред нотар, па денеска има 6.676 потписи. Кандидатката на Левица, Биљана Ванковска, која синоќа имаше 7.876 потписи, повторно реагира за непристапноста на подрачните канцеларии на ДИК, каде се собираат потписи.
Наместо да се заблагодарат на поддршката и да повикаат да не се создаваат непотребни гужви, кандидатите кои го собраат потребниот број, сè уште собираат потписи. Тука предничи Бујар Османи, кој до синоќа собрал над 11.000 потписи. Потребната бројка ја имаат и Максим Димитриевски од ЗНАМ и Арбен Таравари од коалицијата „Вреди“.
Официјално, Силјановска Давкова и Пендаровски сè уште не се влезени во трката, но се очекува по одлуките на партиските тела викендов и тие да почнат со собирање на граѓански потписи, иако веќе имаат пратенички потписи.
Крајниот рок за добивањето на поддршка за влез во претседателската трка истекува на 8 март на полноќ.
Далиборка Демјанска Цветановска