Блерим Беџети, претседателот на општина Сарај и еден од членовите на „Огнената група“ во ДУИ, вели дека заедно со Муса Џафери и Невзат Бејта не ја поддржуваат идејата да се формира нов политички субјект и да се одвојат од ДУИ.
Беџети вели дека се против ваквата одлука, бидејќи на тој начин ќе се фрагментаризира, ќе се расцепка албанското бирачко тело. “Јас, Муса Џафери и Невзат Бејта сме против формирањето нов политички субјект. Нема потреба да се формира нова политичка партија.“ – нагласува Блерим Беџети.
Тој во интервју за порталот „Журнал“ потврдува дека постојат разлики меѓу членовите на оваа група додавајќи дека тие тројцата инсистираат за овие прашања да се решава со аргументи преку расправа внатре во Демократската унија за интеграција. „Има разлики меѓу нас. Ние сме фракција во рамки на ДУИ и треба разликите да ги решаваме внатре во ДУИ.“ – истакнува Блерим Беџети.