Пристрасно и еднострано, Владиката Петар го обвини феминизмот за големиот број на разводи, а со огромен цинизам, како еманципирана, ја претстави разведената жена и самохрана мајка, вели адвокатката од Битола, Катерина Котеска Стисниовска, која е специјалист по семејно право и додава дека во секој брак и во секој развод има две страни.
„Треба причината да се бара во двете страни. Не постои еднострано настанување на овој проблем, ниту во нивно решавање. Голготата на самохраните мајки е секојдневна, не затоа што тие сакаат да бидат еманципирани, самохрани и слободни жени. Во голем број случаи се оставени сами на себе да си ја водат битката за егзистенција за децата“, вели м-р Катерина Котеска Стисниовска, адвокатка.
Котеска вели дека наместо да се напаѓаат и стигматизираат разведените жени, потребно е во општеството да се отвори дебата за нивните суштински проблеми. Таа му порача на Владиката следниот пат да не заборава да ги укори мажите кои го напуштаат семејството и не плаќаат алиментација.
„Голем број мажи заминуваат на работа во странство со бугарски пасоши, не може од нив да се наплатат побарувањата и мајките се оставени без било каква помош за децата. Многу често се на работ на егзистенција“, додава Катерина Котеска Стисниовска.
На Велигденското послание на Владиката Петар реагираше и министерката за труд и социјална политика, Јована Тренчевска, која му порача дека не е време за инквизиција, а жената не бара повеќе, туку исти права и можности како мажите.
„Ама Владико, тоа ти со твоите ретроградни ставови, со понижувањата и омаловажувањата кон жената не можеш да го разбереш. Богохулие е отровот што го пушташ и со кој навредуваш и понижуваш 51% од популацијата. Не си ги разбрал поимите, но и времето во кое живееме“, напиша Јованка Тренчевска, министерка за труд и социјална политика.
Директорот на Комисијата за односи со верските заедници, Дарјан Сотировски, пак, вели дека во демократски амбиент нормално е да се очекува вкрстување на мислења, ставови и цели.
„Црквата со своето учење има право слободно да поучува и јавно да го искажува своето мислење. Замолкнувањето на било кој, е укинување на демократијата за сите. Исто како што ставањето во грешен контекст на нечија изјава или нечие залагање за човекови права може да доведе и до манипулирана перцепција од јавноста“, вели Дарјан Сотировски, директор на Комисијата за верски заедници.
Велигденско послание на Владиката Петар, во кое тој го нападна феминизмот, а родовата еднаквост рече дека е изопачена, отровна и богохулна, предизвика бура реакции и осуди во јавноста. Синодот на МПЦ не расправал за изјавата на Митрополитот Преспанско пелагониски.
Емилија Мисирлиевски