Наредната недела, Владата ќе го состави тимот за уставни измени. Додека јавноста лицитира со имињата на членовите – експерти за уставно право, Министерството за правда побара: парламентарните партии, претседателот, Секретаријатот за европски прашања, МНР и експертите за уставни прашања да номинираат претставници најдоцна до 10-ти април.
„Потребно е политичко обединување во интерес на исполнувањето на нашата обврска произлезена од Преговарачката рамка“, велат од „Правда“.
Работни групи не се формираат сега туку во втората фаза, откако Собранието со дво-третинско мнозинство ќе поддржи потреба од уставни измени, објаснува ВМРО-ДПМНЕ.
Мицкоски бара власта да се изјасни дали е за хрватскиот модел, според кој „Република Македонија се дефинира како држава на македонскиот народ и на малцинствата…“ Овој предлог нема да го достави до работната група за уставни измени, но подготвен е да го образложи на лидерска средба во било каков формат, независно дали ќе ја организира претседателот или премиерот.
Алијанса повикува да не се споредуваме со Хрватска, во која 90 одсто од населението се Хрвати, туку со други земји кои имаат слична структура со Македонија.
Алтернатива изнесе два предлога: „Северна Македонија да се дефинира како држава на македонската нација, на албанската нација и на другите етнички заедници“, или како „држава на нејзините граѓани“.
Пораката на СДСМ е сите предлози и идеи да се разгледуваат во рамки на работната група. Повикува на инклузивен и транспарентен процес за промена на Уставот, со што ќе продолжи европскиот пат на државата.
Соња Николовска