Потврдена е интрахоспитална инфекција во прилепската болница, поради која минатата недела се затворени сите операциони сали, откако 52-годишна пациентка почина од сепса. Станува збор за бактеријата Staphylococcus epidermidis, која е изолирана од земен примерок од Центарот за јавно здрвје во Прилеп, соопштија за Телма од Државниот санитарен и здравствен инспекторат (ДСЗИ).
Ова е констатирано по вонредниот инспекциски надзор на Државниот здравствен и санитарен инспекторат направен на 17 февруари.
„Од Центар за јавно здравје Прилеп е извршен епидемиолошки увид по појава на случај на пациентка кај која е извршена интервенција на одделот за гинекологија по што се јавиле симптоми на сепса. Земени се примероци од нежива средина и од здравствен персонал, извршени се вонредни здравствено-хигиенски прегледи, по што е препорачано затворање на операционите сали. Од земениот примерок за хемокултура добиен е позитивен изолат на Staphylococcus epidermidis. Пријавена е интрахоспитална инфекција“, информираат од ДСЗИ.
Дали истата бактерија е причина за смртта кај 52-годишната пациентка кај која беше изврешна гинеколошка интервенција во прилепската болница, сè уште не е потврдено. Нејзиното тело е предадено на обдукција во Институтот за патологија и се чека наодот. Додека се затворени салите во Гинеколошкото, Хируршкото и Ортопедското одделение, итните интервенции се вршат во битолската болница.
Емилија Мисирлиевски