Наместо до Грција, како што се најавуваше со години, возот по обновената пруга до грчка граница ќе патува само од Битола до Жабени каде е и индустриската зона. Засега пропаднаа сите надежи на битолчани и жителите од Пелагонискиот регион, дека со евтин железнички превоз ќе одат до Лерин, Воден или Солун.
- Тешко веројатно дека ќе се оди со воз до Грција, затоа што имам некоја информација дека Грците ги укинаа линии од Лерин до Воден и Солун, вели битолчанец
- Каков Лерин, тоа е мислена именка. Лерин е колку до Париз за овие, вели друг битолчанец
Од МЖ транспорт велат не зависи од нив дали наскоро може да се очекува железничко поврзување на Битола со Грција, затоа што тоа е меѓудржавен договор. Но соопштија дека патничкиот воз кој тргнува од Скопје во 7 наутро, последна станица наместо Битола, ќе му биде Жабени, а потоа се враќа во Скопје. Први патници денеска на 10 минутното возење од Битола до жабени беа пензионирани вработени во Македонски железници
- Сакавме да направиме сефте со првиот воз за Жабени, да видиме ккао е изгрдаена пругата, вели патник
- Не знам дали ќе има некоја полза од возот за Жабени, вели битолчанка
Ако пред два века пругата Битола – Лерин – Солун во должина од 200 километри беше изградена за 3 години, а оваа делница од само 17 километри до грчка граница почна да се обновува 8 години. Градбата ја следеа застои и проблеми со изведувачите, се сменија две влади и неколку министери за транспорт и врски. Изградбата чини 17 милиони евра, обезбедени дел од европските фондови, а дел од државниот буџет. Но, наместо меѓународно поврзување, возот оди само до Жабени.
Емилија Мисирлиевски