„Денеска е свети Климент Охридски, нашиот ценет бугарски првоапостол“. „На 29 ноевмри (денот на раѓањето на мртво роденото дете со име Југославија) Комисијата за дискриминација прави обид за цензура на ликот, делото и идеологоијата на Иван Михајлов“… „Во врска со агресивната провокација извршена од скопскиот режим…“ За овие и слични објави на фејсбук страницата, како и бројни фотографии, документи и коментари со кои се велича делото на Ванчо Михајлов, основачот на бугарскиот клуб во Битола денеска беше распрашуван од обвинителите. Пријавите за ширење на расизам и ксенофобија му ги поднесоа Комисијата за дискриминација и партијата Левица. Но, за него овие објави не се провокација.
Обвинение се уште не е поднесено, иако бугарските медиуми деновиве шпекулираа со тоа. Обвинителството соопшти дека, постапката е во тек и се преземаат дејствија за проверка на сите околности. Тие вклучуваат и распит на повеќе лица, вклучително и на пријавениот.
Комисијата за заштита од дискриминација утврди и дека клубот „Ванчо Михајлов“ ги дискриминира и вознемирува борците на НОБ, македонскиот народ и етничките заедници. Претседателот и членовите имаа 45 дена да ги отстранат сите спорни материјали во името, статутот и програмата кои предизвикуваат вознемирување и да ги избришат сите фејсбук статуси во кои го промивираат ликот и делото на Иван Михајлов во рок од 30 дена, но иако роковите поминаа уште во ноември, тоа уште не е сторено.
Далиборка Демјанска Цветановска