Поранешниот генерален секретар на Владата, Мухамед Зеќири не се чувствува виновен за злоупотреба на службената положба за што го гони Обвинителството за организан криминал. Вака се произнесе на првото рочиште од судскиот предмет во кој одговара дека склучил два консултански договори без почитување на Законот за јавни набавки и го оштетил државниот буџет за 89.385.255,00 милиони денари.
Обвинителката Катерина Коларевиќ рече дека Зеќири, како генерален секретар на Владата, свесно не спровел соодветна постапка за јавни набавки и дека обвнитлеството ќе докаже дека тој, иако со заклучок од Влада бил задолжен да спроведе постапка за ангажман на консултантски фирми за реструктуирање на Пошта и соодветен модел на приватизација на Железници, Владата не го ослободила од почитување на законите, ниту му дала одврзани раце да склучи договор во четири очи.
„Законот за јавни набавки е донесен за да постои конкуренција и еднаков третман меѓу економските оператори како и низ транспарентна постапка да се трошат државните пари“, рече Коларевиќ и најави дека има докази, материјални докази, сведоци и вештачења со кои што ќе го докаже обвинението.
Адвокатот на Зеќири, Владимир Андреевски, одговори дека од обвинителката слушнал полуполитички говор за принципи и цели, а не чул и не видел конкретно која законска одредба ја прекршил Зеќири.
Одбраната, рече тој, ќе докаже дека не само што не го прекршил законот, тој не направил ни штета, туку дека напротив целта била да се склучат договори за изнаоѓање на модели за загубарите кои со години трупале долгови, а никој не сносел одговорност за тоа. Одбраната очекува ослободителна пресуда и предлага листа на сведоци меѓу кои се министерот Бочварски, вицепремиерот за економски прашања Битиќи и поранешниот директор на Пошта, Јани Макрадули.
Елена Ивановска Мукоска