Советот на Европската Унија (ЕУ) денеска ја усвои одлуката за потпишување на договорот за гранично управување, познат како Фронтекс, меѓу Унијата и Северна Македонија.
Документот беше блокиран од Бугарија поради употребата на терминот македонски јазик. Софија денеска дефинитивно го крена ветото, оставајќи ја формулата македонски јазик недопрена, како што е случај за сите други земји од регионот кои имаат договор со агенцијата Фронтекс. Договорот сега треба да биде одобрен од Европскиот парламент.
„Договорот со Северна Македонија е важен чекор во оваа блиска соработка. Ќе му овозможи на Фронтекс да пружа конкретна поддршка на терен, во корист и на Северна Македонија и на ЕУ“, изјави чешкиот министер за внатрешни работи, Вит Ракушан.
Европскиот парламент во најбрз можен рок треба да даде зелено светло за Скопје и Брисел да можат и официјално да го потпишат договорот на 20 октомври.
Откако ќе стапи на сила, Фронтекс ќе може да биде поинволвиран во управување со границите во Северна Македонија во однос на миграциските текови и борбата против „илегалната миграција“. ЕУ смета дека зајакнувањето на контролите на македонските граници ќе помогне да се подобри безбедноста на границите на ЕУ.