Во родната куќа во делчевско Тработивиште, беше отворена спомен соба на Димитар Узунски. Узунски е најзаслужен за впишувањето на орото „Копачката“ во УНЕСКО, во Репрезентативната листа за нематеријални културни наследства на човештвото, а покрај тоа познатиот делчевец собираше и фолклорно и народно духовно богатство и традиционални предмети.
Голем дел од неговиот труд е сместен во спомен просторот посветен на Узунски.. Собата е уредена во неговата родна куќа во с. Тработивиште, Делчево и во неа се изложени неговите лични документи, фотографии, најзначајни дипломи, благодарници, признанија, награди. Посебно место во собата но и во македонската култура заземаат ракописите на Узунски од собирачката фолклорна дејност, собрани во неговите тетратки, а значајни експонати се и неговите инструменти, препознатливата и традиционална носија, машината за чукање на која творел.
Проектот „Соба на Димитар Узунски за културното наследство на Пијанец“, на ЗФГ КОПАЧКА с. Драмче Делчево е субвенциониран од Министерство за култура – Сектор за заштита на културното наследство- Одделение за музејска дејност и нематеријално културно наследство, од Годишната национална програма за 2021 и со дополнителна поддршка од Градоначалникот на Општината Делчево.
