Употребила исправа со невистинита содржина, аплицирала на Јавен оглас за избор на директор и била именувана на функцијата. Против 44-годишната М.В. од Велес е поднесена кривична пријава поради постоење на основи за сомнение за сторено кривично дело „употреба на исправа со невистинита содржина“, согласно член 380, ст.1 од Кривичниот законик, информираат од Министерството за внатрешни работи (МВР).
„Пријавената, на функција директор во општинска јавна установа за деца – детска градинка во Велес, прибавила меѓународно признат сертификат за познавање на англиски јазик со нејзино име, издадена од училиште за јазици од Пловдив, Р. Бугарија. Иако знаела дека исправата е со невистинита содржина, М.В. ја употребила како доказ дека поседува меѓународно признат сертификат при нејзиното аплицирање на Јавен оглас за избор на директор на детската градинка, по што и била именувана на функцијата“, се вели во соопштението на Министерството за внатрешни работи (МВР).