Обвинителството соопшти дека кочанскиот суд пресудил доживотна затворска казна на убиец кој извршил фемицид во Кочани, лани во септември. Жената беше убиена со 40-тина убоди со нож од свирепиот убиец.
Жената била убиена рано наутро во 6:15 часот кога тргнала на работа, а 59-годишниот убиец ја чекал за да ја усмрти. Маладеновска пред убиството пријавила уцена во полицијата и во јавното обвинителство во Кочани. Но, додека се постапувало по пријавата таа е убиена.
Во продолжение соопштението на јавното обвинителство:
По поднесено обвинение од Основното јавно обвинителство Кочани, а по признание на вина, Основниот суд во Кочани донесе осудителна пресуда за едно лице за кривично дело – Убиство извршено при родово базирано насилство и на свиреп начин, при што за сторителот е изречена казна – доживотен затвор.
Обвинетиот, на 25.09.2023 година на свиреп начин лиши од живот жена, нанесувајќи и многубројни убоди со нож.
Во обвинението, Основното јавно обвинителство Кочани го товареше обвинетиот и за кривично дело – Уцена кон истата оштетена, сторено пред убиството. Меѓутоа тоа дело обвинетиот не го призна, постапката е раздвоена и за тој дел од обвинението ќе продолжи судска постапка.
Според првичните сознанија, причина за нападот е изнуда на пари и закана со компромитирачки снимки што напаѓачот се заканувал дека ќе ги објави јавно. Жената претходно неколкупати пријавувала закани во полиција и во јавното обвинителство од каде што барала и заштита.